کراچی (شوبز ڈیسک) پاکستان کے معروف اداکار احسن خان نئی انٹرنیشنل ہارر فیچر فلم "فراموش" میں اداکار اور پروڈیوسر صمد عارض کے ہمراہ مرکزی کردار ادا کریں گے۔فلم ایمبرلائن اسٹوڈیو لمیٹڈ کے بینر تلے تیار کی جا رہی ہے اور اسے رواں سال کی نمایاں بین الاقوامی مشترکہ فلمی پروڈکشنز میں شمار کیا جا رہا ہے۔ اس کے مصنف اور ہدایت کار معروف فلم ساز ابو علیہا ہیں۔رپورٹس کے مطابق فلم کی باقاعدہ شوٹنگ یکم ستمبر سے برطانیہ میں شروع ہوگی، جبکہ ستمبر کے وسط تک مختلف مقامات پر عکس بندی کا سلسلہ جاری رہے گا۔"فراموش" ایک اردو پنجابی ہارر تھرلر فلم ہے، جس میں پاکستان اور بھارت سے تعلق رکھنے والے فنکار ایک ساتھ اپنی صلاحیتوں کا مظاہرہ کریں گے۔ فلم کا مقصد ناظرین کو منفرد اور سنسنی خیز سینما تجربہ فراہم کرنے کے ساتھ سرحد پار تخلیقی تعاون کو بھی فروغ دینا ہے۔فلم کے پروڈیوسر و اداکار صمد عارض نے کہا کہ ان کا مقصد عالمی معیار کی ایسی فلمیں بنانا ہے جو پاکستانی کہانیوں اور فنکاروں کی صلاحیتوں کو بین الاقوامی سطح پر متعارف کرائیں۔انہوں نے مزید کہا کہ عالمی معیار کی فلمی پروڈکشنز پاکستان کی فلم انڈسٹری کو مضبوط بنانے، سینما کلچر کی بحالی اور شائقین کو دوبارہ سینما گھروں کی جانب راغب کرنے میں اہم کردار ادا کر سکتی ہیں۔فلمی مبصرین کے مطابق "فراموش" جنوبی ایشیا کی نمایاں ہارر فلموں میں شامل ہونے کی صلاحیت رکھتی ہے اور یہ عالمی سینما میں پاکستان کی بڑھتی ہوئی موجودگی کو مزید تقویت دے سکتی ہے۔
