اکشے کمار نے ایک ماہ میں 20 کروڑ روپے کی جائیدادیں فروخت کر دیں
ممبئی( شوبز ڈیسک) بالی ووڈ کے معروف اداکار اکشے کمار نے ممبئی کی مہنگی رئیل اسٹیٹ مارکیٹ میں صرف ایک ماہ کے دوران تقریباً 20 کروڑ روپے مالیت کی چار لگژری جائیدادیں فروخت کر دیں۔بھارتی میڈیا کے مطابق پراپرٹی رجسٹریشن ڈیٹا سے معلوم ہوا ہے کہ اکشے کمار نے 30 جون 2026 کو ممبئی کے علاقے ملنڈ ویسٹ میں واقع اوبرائے اینگما کی 18ویں منزل پر موجود دو اپارٹمنٹس 12.38 کروڑ روپے میں فروخت کیے۔ ہر اپارٹمنٹ کا رقبہ 1886 مربع فٹ ہے اور اس کے ساتھ تین پارکنگ اسپیسز بھی شامل ہیں۔رپورٹ کے مطابق اداکار نے یہ اپارٹمنٹس 2017 میں مجموعی طور پر 9 کروڑ روپے میں خریدے تھے، جس سے انہیں تقریباً 3.3 کروڑ روپے کا منافع حاصل ہوا۔اس سے قبل جون 2026 کے آغاز میں اکشے کمار نے بوریولی ایسٹ میں واقع اوبرائے اسکائی سٹی کے دو مزید اپارٹمنٹس بھی فروخت کیے تھے، جن کی مجموعی مالیت 7.10 کروڑ روپے بتائی گئی ہے۔یوں صرف ایک ماہ کے دوران اداکار نے تقریباً 19.5 کروڑ روپے مالیت کی چار رہائشی جائیدادیں فروخت کیں۔