لاہور( شوبز ڈیسک) پاکستانی گلوکار اور اداکار علی ظفر نے حضور نبی اکرم ﷺ کی مدح میں نئی نعت سوہنا نبی جاری کر دی۔علی ظفر نے سماجی رابطے کی ویب گاہ پر نعت کے اجرا کا اعلان کرتے ہوئے کہا کہ یہ تخلیق ایسے وقت میں پیش کی جا رہی ہے جب دنیا پہلے سے زیادہ شور، سختی اور تقسیم کا شکار دکھائی دیتی ہے اور لوگ آج بھی روشنی، رحمت اور ہمدردی کی تلاش میں ہیں۔انہوں نے اپنی تحریر میں کہا کہ سوہنا نبی محبوب نبی حضرت محمد ﷺ کی محبت اور یاد میں پیش کی گئی ایک عاجزانہ نعت ہے۔ ان کے مطابق نبی کریم ﷺ کی زندگی اور پیغام نے تاریکی میں ڈوبی دنیا کو روشنی عطا کی اور آج بھی آپ ﷺ کی تعلیمات انسانیت کو وقار، رحم دلی اور باہمی احترام کے ساتھ جینے کا درس دیتی ہیں۔علی ظفر نے اسے اپنی جانب سے محبت اور عقیدت کا ایک چھوٹا سا اظہار قرار دیتے ہوئے کہا کہ یہ نعت مخلوق خدا میں سب سے خوبصورت ہستی کے حضور خراج عقیدت ہے۔نعت کی آڈیو کی تیاری علی ظفر نے خود کی جبکہ اس کے بول، دھن اور موسیقی کی ترتیب حسن بادشاہ نے دی ہے۔ ریکارڈنگ میں عامر علی نے طبلہ، تیمور علی حیدر نے ڈھولک جبکہ حیدر علی اور استاد تنویر حسین نے دیگر سازوں کے ذریعے حصہ ڈالا۔اس نعت کی ویڈیو بھی علی ظفر نے خود تیار کی، اس کی ہدایت دی اور تدوین بھی خود ہی انجام دی۔
