ممبئی( شو بز ڈیسک)بالی ووڈ کے معروف اداکار امیتابھ بچن نے ریٹائرمنٹ سے متعلق اپنے خیالات کا اظہار کرتے ہوئے واضح کیا ہے کہ وہ فی الحال فلمی دنیا سے کنارہ کشی اختیار کرنے کا کوئی ارادہ نہیں رکھتے۔ایک انٹرویو میں فلم سازی اور ریٹائرمنٹ کے موضوع پر گفتگو کرتے ہوئے امیتابھ بچن نے کہا کہ ہدایت کار بننے کا خیال کبھی ان کے ذہن میں نہیں آیا، کیونکہ وہ اس فن کے بارے میں خود کو اتنا ماہر نہیں سمجھتے۔اداکار کے مطابق دوسرے تخلیقی افراد انہیں مختلف چیلنج دیتے ہیں، جنہیں وہ قبول کر لیتے ہیں، تاہم انہوں نے اس سے آگے کبھی کچھ سوچنے کی کوشش نہیں کی۔ریٹائرمنٹ سے متعلق سوال پر امیتابھ بچن نے کہا کہ وہ کام چھوڑنے کے بارے میں کیوں سوچیں؟ لوگ انہیں کام سے سبکدوش کرانے کے لیے اتنے بے تاب کیوں ہیں؟انہوں نے مزید کہا کہ وہ موت کے منہ سے واپس آ چکے ہیں اور انہیں دوبارہ زندگی ملی ہے۔ ان کا ماننا ہے کہ ان برسوں کے دوران کوئی نہ کوئی ہستی ان کی حفاظت کرتی رہی ہے۔واضح رہے کہ امیتابھ بچن نے 1969ء میں فلم ’سات ہندوستانی‘ سے اپنے فلمی سفر کا آغاز کیا تھا، جبکہ 1973ء میں ریلیز ہونے والی فلم ’زنجیر‘ نے انہیں غیر معمولی شہرت دلائی۔امیتابھ بچن ان دنوں ٹیلی وژن کے مقبول پروگرام ’کون بنے گا کروڑ پتی‘ کے اٹھارہویں سیزن کی میزبانی کر رہے ہیں۔
