ممبئی( شو بز ڈیسک) بالی ووڈ کے معروف اداکار امیتابھ بچن نے فلم کی عکس بندی کے دوران گھٹنے پر چوٹ لگنے کا انکشاف کیا ہے، جس کے بعد مداحوں میں تشویش پائی جانے لگی۔بھارتی میڈیا کے مطابق سینئر اداکار نے کوئز پروگرام ’’کون بنے گا کروڑ پتی 18‘‘ کی حالیہ قسط میں اپنی صحت کے بارے میں ناظرین کو بتایا۔امیتابھ بچن نے پروگرام کا آغاز کرتے ہوئے کہا کہ گزشتہ روز شوٹنگ کے دوران ان کا پاؤں پھسل گیا تھا، جس کے باعث وہ گر پڑے اور ان کے گھٹنے پر چوٹ آگئی۔83 سالہ اداکار نے بائیں گھٹنے کی طرف اشارہ کرتے ہوئے بتایا کہ اگرچہ چوٹ لگی ہے، تاہم یہ زیادہ سنگین نوعیت کی نہیں۔ انہوں نے کہا کہ امیدواروں کے ساتھ پروگرام کی میزبانی کے دوران وہ کھڑے رہیں گے، تاہم ابتدائی گفتگو بیٹھ کر کریں گے کیونکہ اس وقت زیادہ دیر کھڑے ہونے میں انہیں کچھ دشواری محسوس ہو رہی ہے۔امیتابھ بچن کی چوٹ کا سن کر پروگرام میں موجود ناظرین نے تشویش کا اظہار کیا اور ان کی جلد صحت یابی کے لیے نیک خواہشات کا اظہار کیا۔واضح رہے کہ امیتابھ بچن دو دہائیوں سے زائد عرصے سے ’’کون بنے گا کروڑ پتی‘‘ کی میزبانی کر رہے ہیں۔ اس پروگرام کی پہلی قسط 3 جولائی 2000ء کو نشر ہوئی تھی اور ابتدا ہی سے امیتابھ بچن اس کی میزبانی کرتے آرہے ہیں۔
