نئی دہلی( مانیٹرنگ ڈیسک) عالمی ادارے ایمنسٹی انٹرنیشنل نے بھارت میں غیر سرکاری تنظیموں اور تنقیدی آوازوں کے حوالے سے غیر ملکی فنڈنگ قوانین میں کی جانے والی ترامیم پر تشویش کا اظہار کیا ہے۔ایمنسٹی انٹرنیشنل سمیت 8 انسانی حقوق کی تنظیموں نے فارن کنٹری بیوشن ریگولیشن ایکٹ کے قواعد میں کی گئی تبدیلیاں واپس لینے کا مطالبہ کیا ہے۔ایمنسٹی کی رپورٹ کے مطابق بھارت کے نئے غیر ملکی فنڈنگ قوانین سول سوسائٹی کی نگرانی میں اضافے اور تنظیم سازی کی آزادی کے حق کو محدود کر رہے ہیں۔رپورٹ میں کہا گیا ہے کہ انسانی حقوق، پالیسی تحقیق، عوامی شعور اجاگر کرنے، قانونی اصلاحات اور حکومتی احتساب کے شعبوں میں کام کرنے والی ہزاروں تنظیمیں ان قوانین سے متاثر ہو سکتی ہیں۔انسانی حقوق کی تنظیموں کا مؤقف ہے کہ بھارت کے موجودہ قوانین عالمی اصولوں سے مطابقت نہیں رکھتے اور ان کے ذریعے غیر سرکاری اداروں پر غیر ضروری اور سخت پابندیاں عائد کی جا رہی ہیں۔
