اسلام آباد( کامرس ڈیسک) ملک کے توانائی شعبے کا مجموعی سرکلر ڈیٹ 5 ہزار 286 ارب روپے تک پہنچ گیا ہے۔ذرائع کے مطابق گیس شعبے کا سرکلر ڈیٹ 3 ہزار 611 ارب روپے جبکہ بجلی شعبے کا ایک ہزار 675 ارب روپے ریکارڈ کیا گیا، یوں مجموعی سرکلر ڈیٹ میں گیس شعبے کا حصہ بجلی کے شعبے سے نمایاں زیادہ ہے۔آئی ایم ایف کے مطابق پاکستان کا توانائی شعبہ بدستور مالی دباؤ کا شکار ہے اور مالی استحکام کے لیے اصلاحات تیز کرنا ضروری ہے۔عالمی مالیاتی ادارے نے سرکلر ڈیٹ پر قابو پانے کے لیے بروقت ٹیرف ایڈجسٹمنٹ اور توانائی شعبے کے نقصانات میں کمی پر زور دیا ہے۔آئی ایم ایف کا کہنا ہے کہ بجلی شعبے میں سرکلر ڈیٹ کے بہاؤ کو کم کرنا پاکستان کے لیے اہم چیلنج ہے، جبکہ گیس شعبے میں لاگت کے مطابق ٹیرف ایڈجسٹمنٹ جاری رکھنا بھی ضروری ہے۔عالمی مالیاتی فنڈ کے مطابق توانائی شعبے کی کمزوریاں پاکستان کے مالی استحکام کے لیے خطرہ ہیں۔ حکومت نے رواں مالی سال بجلی شعبے کے سرکلر ڈیٹ میں اضافے کی رفتار مزید کم کرنے کا عزم ظاہر کیا ہے، جبکہ اصلاحات کا مقصد نقصانات گھٹا کر بجلی اور گیس کے شعبوں کو مالی طور پر مستحکم بنانا ہے۔
