کراچی( شوبز ڈیسک) پاکستان کی سابق اداکارہ اور حمزہ علی عباسی کی اہلیہ نیمل خاور نے اپنے وزن اور جسمانی ساخت سے متعلق قیاس آرائیاں کرنے والے سوشل میڈیا صفحات کو تنقید کا نشانہ بنا دیا۔حال ہی میں نیمل خاور نے اپنے سوشل میڈیا اکاؤنٹ پر ایک تقریب کی تصاویر شیئر کیں، جو وائرل ہونے کے بعد مختلف صفحات نے دوبارہ شائع کیں اور ان کی جانب سے یہ قیاس آرائیاں کی گئیں کہ شاید وہ امید سے ہیں۔ان تبصروں کے بعد سابق اداکارہ نے سماجی رابطے کی ویب سائٹ پر جاری اپنی تحریر میں سخت ردعمل دیتے ہوئے کہا کہ یہ حیران کن ہے کہ لوگ خواتین کے جسم پر تبصرہ کرتے ہوئے کسی جھجھک کا مظاہرہ نہیں کرتے۔ انہوں نے کہا کہ ان کے وزن میں تبدیلی ممکن ہے اور ضروری نہیں کہ وہ پانچ سال پہلے جیسی دکھائی دیں۔نیمل خاور نے کہا کہ ماں بننے کے بعد خواتین کے جسم میں کئی طرح کی تبدیلیاں آتی ہیں۔ عمر، ہارمونز، ذہنی دباؤ، صحت، طرزِ زندگی اور حمل سمیت مختلف عوامل جسمانی تبدیلی کا سبب بن سکتے ہیں۔انہوں نے واضح کیا کہ ان میں سے کوئی بھی وجہ لوگوں کو یہ حق نہیں دیتی کہ وہ کسی خاتون کے جسم یا وزن کو سرعام تنقید کا نشانہ بنائیں۔
