کراچی( شوبز ڈیسک) معروف پاکستانی قوال و گلوکار راحت فتح علی خان نے استاد نصرت فتح علی خان کی برسی پر ان کی قبر کے قریب قوالی پیش کرنے پر ہونے والی تنقید کا جواب دے دیا۔ایک یوٹیوب پروگرام میں گفتگو کرتے ہوئے راحت فتح علی خان نے کہا کہ بعض سوشل میڈیا صارفین محبت کے جذبے کے تحت تنقید کرتے ہیں، تاہم جو لوگ قوالی کی روایات سے واقف نہیں، وہ اس عمل کو تنقید کا نشانہ بناتے ہیں۔انہوں نے کہا کہ وہ اپنی خاندانی میراث اور ایک صدی پرانی روایت پر عمل کرتے ہیں، قوال خاندانوں میں یہ طریقہ رائج ہے اور انہیں اس پر کوئی افسوس نہیں۔راحت فتح علی خان نے وضاحت کی کہ وہ قبر کے اندر کھڑے نہیں تھے بلکہ قبر کے اطراف کھڑے ہوکر قوالی پیش کررہے تھے اور اس دوران مکمل احترام ملحوظ رکھا گیا۔ ان کے مطابق ان کا انداز بھی اس احترام کی عکاسی کر رہا تھا۔انہوں نے افسوس کا اظہار کرتے ہوئے کہا کہ انہیں یقین نہیں آتا کہ ان کے اپنے کسی عزیز نے بھی ان کے خلاف اتنی باتیں کیں۔ انہوں نے مزید بتایا کہ قوالی سے قبل قرآن خوانی اور دعاؤں کا بھی اہتمام کیا گیا تھا۔
