اسلام آباد( کامرس ڈیسک)عام شہری پیٹرولیم مصنوعات کی قیمتوں میں شامل بھاری ٹیکسوں، لیوی اور مختلف مارجنز کے باعث شدید معاشی دباؤ کا شکار ہیں۔ دستیاب اعداد و شمار کے مطابق ایک لیٹر پیٹرول پر صارفین سے مجموعی طور پر 130 روپے 75 پیسے جبکہ ہائی اسپیڈ ڈیزل پر 122 روپے 47 پیسے ٹیکس اور مختلف مارجنز کی مد میں وصول کیے جا رہے ہیں۔ڈیزل کی بنیادی لاگت 245 روپے 82 پیسے فی لیٹر ہے، جبکہ اس کی مقررہ مارکیٹ قیمت 368 روپے 29 پیسے ہے۔ دونوں قیمتوں کے درمیان 122 روپے 47 پیسے کا فرق لیوی، ٹیکس اور مختلف مارجنز پر مشتمل ہے۔حکومت نے چند روز قبل پیٹرولیم ڈیلرز کے مارجن میں بھی ایک روپے 34 پیسے فی لیٹر اضافہ کیا، جس کے بعد پیٹرول اور ڈیزل پر ڈیلرز کا مارجن 8 روپے 64 پیسے سے بڑھ کر 9 روپے 98 پیسے فی لیٹر ہوگیا ہے۔
