ممبئی( شو بز ڈیسک)بالی ووڈ فلم ’’ویلکم‘‘ کے ہدایت کار انیس بزمی نے انکشاف کیا ہے کہ انہوں نے نانا پاٹیکر کو فلم میں اودے شیٹی کا کردار ادا کرنے کیلئے کس طرح آمادہ کیا۔انیس بزمی کے مطابق نانا پاٹیکر ابتدا میں یہ کردار کرنے کیلئے تیار نہیں تھے۔ انہوں نے اداکار کو فون کرکے ملاقات کی اور فلم کی کہانی سنانے کی خواہش ظاہر کی۔ ملاقات کے دوران نانا پاٹیکر نے کہانی سننے سے پہلے ہی ہدایت کار سے یقین دہانی مانگی کہ فلم ان کیلئے مناسب ہے۔ہدایت کار نے بتایا کہ انہوں نے قسم دینے کے بجائے مکمل کہانی سنانے کا فیصلہ کیا اور تقریباً 3 گھنٹے تک نانا پاٹیکر کو فلم کا اسکرپٹ سناتے رہے۔ کہانی مکمل ہونے پر اداکار نے انہیں گلے لگایا اور کہا کہ وہ کچی مٹی کی طرح ہیں، ہدایت کار انہیں جس روپ میں چاہیں ڈھال سکتے ہیں۔انیس بزمی نے کہا کہ نانا پاٹیکر کے غصے اور سخت مزاجی کے بارے میں عام طور پر بات کی جاتی ہے، تاہم ان کے ذاتی تجربے میں اداکار کے ساتھ کام کرنا انتہائی آسان رہا۔2007 میں ریلیز ہونے والی ’’ویلکم‘‘ میں نانا پاٹیکر نے خوفناک ڈان اودے شیٹی کا مزاحیہ کردار نبھایا تھا۔ انیل کپور کے مجنوں بھائی کے ساتھ ان کی جوڑی اور نوک جھونک نے کردار کو بے حد مقبول بنایا، جو بعدازاں سوشل میڈیا پر بھی مشہور میمز کا حصہ بن گیا۔
