ممبئی (شوبز ڈیسک) بھارتی ٹیلی ویژن کی معروف اداکارہ اپارا مہتا نے اپنے شوہر اور اداکار درشن جری والا سے طویل عرصے سے جاری علیحدگی کے معاملے پر پہلی بار کھل کر گفتگو کی ہے۔اپارا مہتا نے حال ہی میں ڈیجیٹل ٹاک شو اور پوڈکاسٹ "دی میل فیمینسٹ" میں شرکت کی، جہاں انہوں نے اپنی نجی زندگی، ازدواجی تعلقات اور درشن جری والا سے علیحدگی سمیت مختلف موضوعات پر بات کی۔اداکارہ نے بتایا کہ جب وہ امریکا میں موجود تھیں تو انہوں نے شادی کی سالگرہ کے موقع پر درشن جری والا کو مبارکباد دینے کے لیے فون کیا، تاہم درشن نے جواب دیا کہ انہیں ان سے ایک اہم بات کرنی ہے۔اپارا مہتا کے مطابق امریکا میں اپنے شوز مکمل کرنے کے بعد جب وہ بھارت واپس آئیں تو درشن جری والا نے انہیں بتایا کہ وہ اب یہ رشتہ مزید جاری نہیں رکھنا چاہتے۔انہوں نے کہا کہ درشن نے ان سے کہا کہ وہ الگ ہونا چاہتے ہیں کیونکہ ان کے دل میں اب پہلے جیسے جذبات باقی نہیں رہے۔اپارا مہتا نے گفتگو کے دوران اس مشکل وقت اور اپنی ذاتی زندگی کے تجربات کو بھی مداحوں کے ساتھ شیئر کیا۔
