واشنگٹن( ویب ڈیسک)ٹیکنالوجی کمپنی ایپل رواں سال کے آخر میں یورپ میں اپنا پہلا ڈویلپر مرکز قائم کرنے جا رہی ہے۔یہ اقدام ایسے وقت میں سامنے آیا ہے جب کمپنی اور یورپی یونین کے درمیان مختلف پالیسی امور پر کشیدگی پائی جاتی رہی ہے۔ اگرچہ ایپل کی یورپی منڈی میں موجودگی مضبوط ہے، تاہم حالیہ عرصے میں ریگولیٹری اداروں کے ساتھ اس کے متعدد تنازعات سامنے آئے ہیں۔یورپی ریگولیٹرز کا مؤقف ہے کہ کمپنی نے اپنے ڈیجیٹل پلیٹ فارمز پر غیر معمولی کنٹرول برقرار رکھا، جس کے نتیجے میں اسے اپنی پالیسیوں میں کئی تبدیلیاں کرنا پڑیں۔یہ نیا مرکز دنیا بھر میں موجود ایپل کے دیگر مراکز کے نیٹ ورک کا حصہ ہوگا، جن میں کپرٹینو، بنگلورو، شنگھائی اور سنگاپور شامل ہیں۔یورپ میں قائم ہونے والا یہ پہلا ڈویلپر مرکز جرمنی کے دارالحکومت برلن میں ہوگا اور اسی سال کے آخر میں اس کا باقاعدہ افتتاح کیا جائے گا۔ایپل کے یہ مراکز ان ڈویلپرز اور کمپنیوں کی معاونت کے لیے قائم کیے جاتے ہیں جو اس کے نظام کے لیے ایپلیکیشنز تیار کرتے ہیں۔ یہاں پروگرامرز کو تربیتی سیشنز، عملی ورکشاپس اور ماہرین کے ساتھ براہ راست رہنمائی فراہم کی جاتی ہے تاکہ وہ اپنی مصنوعات کو مزید بہتر بنا سکیں۔
