لاہور ( سپورٹس ڈیسک) انٹرنیشنل کرکٹ کونسل (آئی سی سی) کی جانب سے جاری کردہ نئی ون ڈے رینکنگ میں پاکستان کے کھلاڑیوں کو بہتر کارکردگی کا صلہ مل گیا، عرفات منہاس نے 33 درجے ترقی حاصل کرلی جبکہ سلمان علی آغا اور حارث رؤف کی پوزیشن میں بھی بہتری آئی ہے۔آئی سی سی کی نئی ون ڈے رینکنگ کے مطابق بلے بازوں میں پاکستان کے بابر اعظم کی ساتویں پوزیشن برقرار ہے، جبکہ سلمان علی آغا ایک درجے ترقی حاصل کرکے بارہویں نمبر پر آگئے ہیں۔دوسری جانب محمد رضوان اور فخر زمان تین، تین درجے تنزلی کے بعد بالترتیب 35ویں اور 44ویں پوزیشن پر چلے گئے، جبکہ صائم ایوب آٹھ درجے نیچے آکر 54ویں نمبر پر آگئے۔بولرز کی فہرست میں ابرار احمد کی دوسری اور شاہین آفریدی کی آٹھویں پوزیشن برقرار ہے۔ حارث رؤف دو درجے ترقی کے بعد 21ویں نمبر پر آگئے، جبکہ نسیم شاہ نے چار درجے بہتری حاصل کرکے 45ویں پوزیشن پر جگہ بنالی۔پاکستان کے عرفات منہاس نے نمایاں ترقی کرتے ہوئے 33 درجے کی چھلانگ لگائی اور 83ویں پوزیشن پر آگئے۔آل راؤنڈرز کی فہرست میں سلمان علی آغا ایک درجے تنزلی کے بعد 14ویں نمبر پر چلے گئے، جبکہ شاہین آفریدی دو درجے ترقی کرکے 17ویں پوزیشن پر آگئے۔
