آریانا گرانڈے کی ٹرمپ انتظامیہ کو وارننگ، موسیقی کے غیر مجاز استعمال پر اعتراض

لاس اینجلس( شو بز ڈیسک) امریکی پاپ اسٹار اور اداکارہ آریانا گرانڈے نے صدر ڈونلڈ ٹرمپ کی انتظامیہ کو سخت تنقید کا نشانہ بناتے ہوئے اپنی موسیقی کے سیاسی مقاصد کے لیے استعمال پر اعتراض کیا ہے۔تنازع اس وقت شروع ہوا جب وائٹ ہاؤس نے ایک سوشل میڈیا ویڈیو میں امیگریشن پالیسیوں کو دکھاتے ہوئے آریانا گرانڈے کا 2024 کا مقبول گانا استعمال کیا۔ ویڈیو میں سرکاری کارروائیوں کے مناظر دکھائے گئے تھے۔آریانا گرانڈے نے اس پر ردعمل دیتے ہوئے کہا کہ ان کی موسیقی کو ایسے اقدامات کے لیے استعمال نہ کیا جائے جنہیں وہ غیر انسانی اور سخت الفاظ میں قابلِ مذمت سمجھتی ہیں۔ذرائع کے مطابق گلوکارہ کی ٹیم اس معاملے کے قانونی پہلوؤں پر بھی غور کر رہی ہے تاکہ متعلقہ ویڈیو سے گانا ہٹایا جا سکے۔دوسری جانب وائٹ ہاؤس کی ترجمان نے اپنے ردعمل میں کہا کہ حکومت کی ترجیح قانون کی عملداری اور ملکی سلامتی کو یقینی بنانا ہے، جبکہ امیگریشن پالیسیوں پر مختلف آرا موجود ہیں۔رپورٹ کے مطابق آریانا گرانڈے طویل عرصے سے امریکی امیگریشن پالیسیوں کی مخالف رہی ہیں اور وہ اکثر تارکین وطن کے حقوق کے حق میں آواز اٹھاتی رہی ہیں۔یہ پہلا موقع نہیں کہ کسی معروف فنکار نے اپنی موسیقی کے سرکاری یا سیاسی استعمال پر اعتراض کیا ہو، کیونکہ اس سے قبل بھی کئی عالمی فنکار ایسی شکایات کر چکے ہیں۔