راکھی ساونت کے ناقابلِ ضمانت وارنٹ گرفتاری جاری، عدالت میں پیشی کا حکم

ممبئی( شو بز ڈیسک)معروف بھارتی اداکارہ راکھی ساونت کے خلاف اتر پردیش کے شہر جھانسی کی عدالت نے 2010 کے ایک خودکشی کیس میں ناقابلِ ضمانت وارنٹ گرفتاری جاری کردیے ہیں۔ پولیس کو اداکارہ کو گرفتار کرکے عدالت میں پیش کرنے کی ہدایت بھی کی گئی ہے۔بھارتی میڈیا رپورٹس کے مطابق، یہ مقدمہ راکھی ساونت کے ٹی وی پروگرام ’’راکھی کا انصاف‘‘ میں ایک شخص کے خلاف مبینہ توہین آمیز اور نامناسب ریمارکس دینے سے متعلق ہے، جس نے بعدازاں مبینہ طور پر خودکشی کرلی تھی۔رپورٹ کے مطابق، فاسٹ ٹریک کورٹ کے ایڈیشنل ڈسٹرکٹ اینڈ سیشن جج نے اداکارہ کے بار بار عدالت میں پیش نہ ہونے پر 16 اکتوبر کو ناقابلِ ضمانت وارنٹ جاری کیے۔سرکاری وکیل مریدول کانت سریواستو کے مطابق، مقدمے کی آئندہ سماعت یکم دسمبر کو ہوگی۔یہ مقدمہ جھانسی کے علاقے ہنساری، پریم نگر کے رہائشی لکشمن اہروار کی موت سے متعلق ہے، جو 10 نومبر 2010 کو انتقال کرگئے تھے۔لکشمن اہروار کی موت کے بعد ان کی والدہ ساوتری نے مقدمہ درج کرایا تھا۔ درخواست میں الزام عائد کیا گیا تھا کہ راکھی ساونت نے اکتوبر 2010 میں نشر ہونے والے اپنے پروگرام میں ان کے بیٹے کے لیے توہین آمیز اور نامناسب الفاظ استعمال کیے تھے۔عدالتی کارروائی کے دوران راکھی ساونت کی مسلسل عدم حاضری کے بعد ان کے ناقابلِ ضمانت وارنٹ گرفتاری جاری کیے گئے ہیں۔ مقدمے کی مزید پیش رفت آئندہ سماعت پر سامنے آنے کی توقع ہے۔