ممبئی (شوبز ڈیسک) بھارتی فاسٹ بولر ارشدیپ سنگھ نے پنجابی ماڈل اور اداکارہ سمرین کور کے ساتھ اپنے تعلقات سے متعلق جاری قیاس آرائیوں کا خاتمہ کرتے ہوئے پہلی بار اس رشتے کو عوامی طور پر تسلیم کر لیا ہے۔ارشدیپ سنگھ نے فوٹو شیئرنگ پلیٹ فارم انسٹاگرام پر سمرین کور کے ساتھ اپنی تصاویر شیئر کیں، جن کے ساتھ انہوں نے مختصر مگر معنی خیز الفاظ "مائی پرسن" لکھے۔تصاویر سامنے آنے کے بعد مداحوں کی جانب سے دونوں کو مبارکباد دی جا رہی ہے، جبکہ سوشل میڈیا صارفین جوڑے کے لیے نیک خواہشات کا اظہار بھی کر رہے ہیں۔ارشدیپ اور سمرین کے تعلقات کی خبریں کیسے سامنے آئیں؟دونوں کے درمیان تعلقات کی خبریں اس وقت شروع ہوئیں جب ارشدیپ سنگھ نے رواں سال اسنیپ چیٹ پر ایک ایسی تصویر شیئر کی جس میں موجود خاتون کا چہرہ واضح نہیں تھا۔سوشل میڈیا صارفین نے تصویر میں نظر آنے والے ٹیٹو اور نیل آرٹ کو سمرین کور سے جوڑتے ہوئے دونوں کے درمیان تعلق کا اندازہ لگایا، جس کے بعد یہ قیاس آرائیاں تیزی سے پھیلنے لگیں۔اب ارشدیپ سنگھ کی جانب سے تصاویر شیئر کرنے کے بعد ان قیاس آرائیوں کو باضابطہ تصدیق مل گئی ہے۔
