لاہور( شو بز ڈیسک)پاکستان کے نامور اداکار شفیع محمد شاہ کی صاحبزادی ارسلنہ محمد شاہ انتقال کر گئی ہیں۔خاندانی ذرائع کے مطابق ارسلنہ محمد شاہ کے انتقال کی اطلاع ان کی بہن نے سوشل میڈیا پر ایک جذباتی پیغام کے ذریعے دی، جس میں بتایا گیا کہ وہ 7 فروری 2026 کو اچانک دل کا دورہ پڑنے کے باعث اس دنیا سے رخصت ہو گئیں۔ارسلنہ محمد شاہ میڈیا کے شعبے سے وابستہ تھیں اور مختلف ٹی وی چینلز میں اسسٹنٹ ڈائریکٹر اور ڈائریکٹر کے طور پر اپنی خدمات انجام دے چکی تھیں۔وہ اپنی پیشہ ورانہ صلاحیتوں کے ساتھ ساتھ اپنی نرم مزاجی، انسان دوستی اور ہمدردانہ رویے کے باعث بھی جانی جاتی تھیں۔اہلِ خانہ کے مطابق وہ سیٹ پر موجود ہر فرد کے ساتھ عزت اور محبت سے پیش آتی تھیں اور ضرورت مند افراد کی خاموشی سے مدد کرنے کی عادت رکھتی تھیں۔خاندانی بیان میں کہا گیا ہے کہ ارسلنہ محمد شاہ نے اپنی زندگی میں بے شمار لوگوں کے دل جیتے اور ہمیشہ دوسروں کی بھلائی کو ترجیح دی۔ان کے انتقال سے خاندان ایک شفیق، مہربان اور محبت کرنے والی شخصیت سے محروم ہو گیا ہے، جس پر گہرے دکھ اور افسوس کا اظہار کیا جا رہا ہے۔
