ناگاؤ (سپورٹس ڈیسک) ایشین گیمز کے مینز کرکٹ ایونٹ میں نیپال، افغانستان، ملائیشیا اور ہانگ کانگ نے کوارٹر فائنل میں جگہ بنا لی۔گروپ مرحلے کے آج شیڈول دونوں میچز بارش کے باعث مکمل نہ ہوسکے۔ جاپان اور نیپال کے درمیان میچ شروع ہوا، تاہم بارش کے باعث اسے 15، 15 اوورز فی اننگز تک محدود کردیا گیا۔نیپال نے پہلے بیٹنگ کرتے ہوئے 15 اوورز میں 4 وکٹوں کے نقصان پر 149 رنز بنائے، تاہم اس کے بعد بارش کے باعث جاپان کی اننگز شروع نہ ہوسکی۔نتیجتاً نیپال 3 اور افغانستان 2 پوائنٹس کے ساتھ اگلے مرحلے میں پہنچ گئے، جبکہ جاپان ایونٹ سے باہر ہوگیا۔دوسری جانب ملائیشیا اور عمان کے درمیان میچ میں ایک بھی گیند نہ پھینکی جاسکی۔ عمان ایک پوائنٹ کے ساتھ ایونٹ سے باہر ہوگیا، جبکہ ملائیشیا 3 اور ہانگ کانگ 2 پوائنٹس کے ساتھ کوارٹر فائنل میں پہنچ گئے۔کوارٹر فائنل میں گروپ مرحلے سے آنے والی چاروں ٹیموں کا مقابلہ براہ راست کوارٹر فائنل میں پہنچنے والی پاکستان، بھارت، سری لنکا اور بنگلادیش کی ٹیموں سے ہوگا۔
