لاہور ( سپورٹس ڈیسک) سابق آسٹریلوی بلے باز مائیک ہسی کی خدمات حاصل کرنے کے لیے آسٹریلیا اور انگلینڈ کے درمیان مقابلہ جاری ہے۔آسٹریلوی ذرائع ابلاغ کے مطابق انگلینڈ کرکٹ ٹیم کے نئے کوچ اسٹیفن فلیمنگ نے مائیک ہسی کو بیٹنگ کوچ مقرر کرنے میں دلچسپی ظاہر کی ہے۔ دونوں ماضی میں ایک فرنچائز لیگ میں ایک ساتھ کام کرچکے ہیں۔فلیمنگ آئندہ ایشز سیریز کے لیے مائیک ہسی کی خدمات حاصل کرنا چاہتے ہیں، جبکہ ہسی نے گزشتہ ہفتے تصدیق کی تھی کہ فلیمنگ نے ان سے رابطہ کیا ہے۔دوسری جانب کرکٹ آسٹریلیا نے بھی مائیک ہسی سے رابطہ کیا ہے۔ آسٹریلوی ذرائع کے مطابق بورڈ قومی ٹیم کی بیٹنگ میں موجود مسائل دور کرنے کے لیے ہسی کو ذمہ داری سونپنے کا خواہاں ہے۔رپورٹس کے مطابق کرکٹ آسٹریلیا کی کوشش ہے کہ مائیک ہسی ایشز سیریز میں انگلینڈ کے ساتھ کام نہ کریں، جبکہ بورڈ ان کی خدمات حاصل کرنے کے لیے ہنگامی بنیادوں پر معاملات طے کرنے میں مصروف ہے۔
