آسٹریلوی سائنس دانوں نے دوا پہنچانے والے سائبرگ کاکروچ تیار کرلیے

سڈنی( ویب ڈیسک) آسٹریلوی سائنس دانوں نے قدرتی آفات اور ہنگامی حالات میں پھنسے افراد تک ادویات پہنچانے کے لیے سائبرگ کاکروچ تیار کرلیے ہیں۔غیر ملکی خبررساں ادارے کے مطابق خصوصی کیمروں اور انجیکشن آلات سے مزین ان کیڑوں کو ’’پیرا بورگز‘‘ کا نام دیا گیا ہے۔ ان کے اعصابی نظام میں برقی آلات نصب کیے گئے ہیں، جن کی مدد سے انہیں دور بیٹھ کر قابو کیا جاسکتا ہے۔محققین کا کہنا ہے کہ یہ سائبرگ کاکروچ تنگ اور دشوار گزار مقامات سے گزر کر متاثرہ افراد تک پہنچنے کی صلاحیت رکھتے ہیں۔ تجربات کے دوران دوا مطلوبہ مقام تک پہنچانے میں مجموعی طور پر 72 فیصد کامیابی حاصل ہوئی، جبکہ کم فاصلے پر کامیابی کی شرح 95 فیصد تک ریکارڈ کی گئی۔سائنس دانوں کے مطابق مستقبل میں اس ٹیکنالوجی کو زلزلوں، منہدم عمارتوں، سانپ کے کاٹے اور دیگر ہنگامی صورتحال میں پھنسے افراد تک ضروری ادویات پہنچانے اور قیمتی جانیں بچانے کے لیے استعمال کیا جاسکتا ہے۔