بھارت کے خلاف ایوارڈز کی بھرمار، شائے ہوپ کا سامان کے وزن پر دلچسپ تبصرہ

لاہور ( سپورٹس ڈیسک)ویسٹ انڈیز کرکٹ ٹیم کے کپتان شائے ہوپ نے بھارت کے خلاف مسلسل عمدہ کارکردگی کے نتیجے میں مین آف دی میچ ایوارڈز حاصل کرنے پر دلچسپ انداز میں تبصرہ کیا ہے۔شائے ہوپ ان دنوں دورۂ بھارت کے دوران وائٹ بال کرکٹ میں شاندار فارم کا مظاہرہ کر رہے ہیں۔ وہ ون ڈے انٹرنیشنل سیریز میں دو سنچریاں بنانے کے بعد ٹی ٹوئنٹی سیریز میں بھی دو سنچریاں اسکور کر چکے ہیں۔ویسٹ انڈیز کے کپتان اب تک بھارت کے خلاف وائٹ بال سیریز میں تین مرتبہ مین آف دی میچ کا اعزاز حاصل کر چکے ہیں۔اپنے ایوارڈز کے حوالے سے گفتگو کرتے ہوئے شائے ہوپ نے مزاحیہ انداز میں کہا کہ سچ تو یہ ہے کہ یہ ایوارڈز کچھ بھاری ہیں، اس لیے ہمیں سامان کے وزن کا بھی خیال رکھنا ہوگا۔ ان کا کہنا تھا کہ وطن واپسی پر شاید ہمیں مشکلات کا سامنا کرنا پڑے۔واضح رہے کہ بھارت نے تین میچوں کی ون ڈے سیریز دو ایک سے اپنے نام کی تھی، جبکہ دونوں ٹیموں کے درمیان پانچ میچوں کی ٹی ٹوئنٹی سیریز دو دو سے برابر ہے۔ سیریز کا آخری اور فیصلہ کن مقابلہ ہفتے کو شیڈول ہے۔