لیڈز( سپورٹس ڈیسک) پاکستان ٹیسٹ ٹیم کے کپتان بابر اعظم کی انگلینڈ کے خلاف 3 ٹیسٹ میچز کی سیریز کے پہلے میچ میں شرکت تاحال یقینی نہیں، ان کی دستیابی میڈیکل ٹیم کی کلیئرنس سے مشروط کردی گئی ہے۔بابر اعظم گزشتہ ہفتے پروفیشنل کاؤنٹی کلب سلیکٹ الیون کے خلاف 3 روزہ پریکٹس میچ کے دوران انگلی پر گیند لگنے سے زخمی ہوگئے تھے۔ یہ واقعہ 39ویں اوور کی آخری گیند پر پیش آیا، جب فاسٹ بولر مینی لَمزڈن کی تیز گیند ان کی انگلی پر لگی۔گیند لگنے کے بعد بابر اعظم تکلیف میں دکھائی دیے، بیٹ چھوڑ دیا اور میڈیکل اسٹاف نے انہیں طبی امداد فراہم کی، جس کے بعد وہ میدان سے باہر چلے گئے۔ایک ماہ کے دوران بابر کے ہاتھ پر گیند لگنے کا یہ دوسرا واقعہ ہے۔ اس سے قبل ویسٹ انڈیز کے خلاف ٹیسٹ سیریز کے دوران بھی انہیں ہاتھ پر گیند لگی تھی۔پاکستان کرکٹ بورڈ کے مطابق احتیاطی تدابیر کے طور پر میڈیکل ٹیم نے بابر کو پریکٹس میچ کا باقی حصہ نہ کھیلنے کا مشورہ دیا تھا۔اگرچہ بابر اعظم کو ہیڈنگلے میں قومی ٹیم کے ساتھی کھلاڑیوں کے ساتھ ٹریننگ کرتے دیکھا گیا ہے، تاہم پہلے ٹیسٹ میں ان کی شرکت کا حتمی فیصلہ ابھی نہیں ہوا۔پاکستانی فاسٹ بولر محمد عباس نے ہیڈنگلے میں پریس کانفرنس کے دوران کہا کہ بابر اعظم کھیلیں گے یا نہیں، اس کا فیصلہ میچ کے روز پی سی بی کی میڈیکل ٹیم کرے گی۔واضح رہے کہ پاکستان اور انگلینڈ کے درمیان 3 ٹیسٹ میچز کی سیریز کا پہلا میچ 19 اگست سے لیڈز میں شروع ہوگا۔
