ممبئی( شوبز ڈیسک)معروف بھارتی گلوکار بادشاہ نے اپنے نئے گانے ٹیٹیری پر ہونے والے شدید ردعمل کے بعد معافی مانگ لی ہے۔بھارتی میڈیا رپورٹس کے مطابق گلوکار خواتین کے قومی کمیشن کے سامنے پیش ہوئے جہاں انہوں نے گانے کے بول اور ویژولز پر پیدا ہونے والے تنازع پر افسوس کا اظہار کیا۔گانے کی ریلیز کے بعد اس کے مواد پر شدید تنقید سامنے آئی تھی اور اسے خواتین کے وقار کے خلاف قرار دیا گیا، جس کے بعد معاملہ ایک بڑی سماجی بحث میں تبدیل ہوگیا۔کمیشن نے مداخلت کرتے ہوئے گلوکار اور اس منصوبے سے وابستہ دیگر افراد کو طلب کیا اور واضح کیا کہ گانے نے خواتین کی عزت کو متاثر کیا ہے۔بادشاہ نے کمیشن کے سامنے پیش ہو کر معذرت کی جس کے بعد یہ گانا مختلف پلیٹ فارمز سے ہٹا دیا گیا۔انہوں نے یقین دہانی کرائی کہ وہ مستقبل میں خواتین کے احترام اور معاشرتی بہتری کے لیے کام کریں گے اور چار ماہ کے اندر ایک مثبت پیغام پر مبنی نیا گانا پیش کریں گے۔گلوکار نے یہ بھی اعلان کیا کہ وہ کمزور معاشی پس منظر سے تعلق رکھنے والی پچاس لڑکیوں کی تعلیم کے اخراجات برداشت کریں گے۔پروجیکٹ سے وابستہ دیگر افراد نے بھی تحریری معافیاں جمع کراتے ہوئے اس معاملے پر افسوس کا اظہار کیا جبکہ حکام کی جانب سے سوشل میڈیا سے گانے کے متعدد روابط ہٹانے کے اقدامات بھی کیے گئے۔
