بلوچستان کی پہلی خاتون کرکٹ کوچ کا صوبے کی بیٹیوں کو قومی ٹیم تک پہنچانے کا عزم

کوئٹہ( سپورٹس ڈیسک) بلوچستان کی پہلی خاتون کرکٹ کوچ خیرالنساء بلوچ نے صوبے کی باصلاحیت لڑکیوں کو کھیل کے میدان میں آگے لانے کا بیڑا اٹھا لیا۔خیرالنساء بلوچ روایتی اور ثقافتی رکاوٹوں کے باوجود خواتین کو کرکٹ کی جانب راغب کرنے اور ان کی صلاحیتیں نکھارنے کے لیے سرگرم ہیں۔ ان کی موجودگی سے نوجوان خواتین کرکٹرز کے اعتماد اور حوصلے میں بھی اضافہ ہو رہا ہے۔خیرالنساء نے کہا کہ بلوچستان کی پہلی خاتون کرکٹ کوچ کا اعزاز حاصل کرنا ان کے لیے باعثِ فخر ہے۔ انہوں نے خواتین کو کھیلوں کے مواقع اور حوصلہ فراہم کرنے کے اقدامات کو قابلِ تحسین قرار دیا۔ان کا کہنا تھا کہ بلوچستان کی بیٹیوں میں بے پناہ صلاحیت موجود ہے، انہیں صرف مناسب مواقع اور تربیت کی ضرورت ہے۔ ان کا مقصد صوبے کی باصلاحیت کھلاڑیوں کو قومی اور عالمی سطح پر پاکستان کی نمائندگی کے قابل بنانا ہے۔خیرالنساء بلوچ نے کہا کہ اگر ان کی تربیت حاصل کرنے والی کوئی کھلاڑی مستقبل میں قومی ٹیم میں پاکستان کی نمائندگی کرے تو یہ ان کی زندگی کی سب سے بڑی کامیابی ہوگی۔