ڈھاکہ( مانیٹرنگ ڈیسک) بنگلہ دیش میں مسلسل بارشوں اور شدید سیلاب نے بڑے پیمانے پر تباہی مچا دی، جس کے نتیجے میں ہلاکتوں کی تعداد بڑھ کر 52 ہو گئی ہے جبکہ 10 لاکھ سے زائد افراد متاثر ہوئے ہیں۔حکام کے مطابق ملک کے 7 اضلاع میں سیلابی صورتحال تاحال تشویشناک ہے، جہاں متعدد سڑکیں، پل اور دیگر بنیادی ڈھانچے کو شدید نقصان پہنچا ہے، جس کے باعث متاثرہ علاقوں تک امدادی ٹیموں کی رسائی میں مشکلات پیش آ رہی ہیں۔رپورٹس کے مطابق سب سے زیادہ جانی نقصان متاثرہ ضلع کاکس بازار میں ہوا، جہاں سیلاب نے بڑے پیمانے پر تباہی پھیلائی۔حکام کا کہنا ہے کہ تقریباً 2 لاکھ 67 ہزار 918 خاندان سیلابی پانی میں پھنسے ہوئے ہیں، جنہیں محفوظ مقامات پر منتقل کرنے کے لیے امدادی سرگرمیاں جاری ہیں۔دوسری جانب بنگلہ دیش کی فوج، بحریہ اور دیگر امدادی ادارے کشتیوں کے ذریعے متاثرہ اور دور دراز علاقوں میں امدادی سامان پہنچا رہے ہیں، جن میں خوراک، پینے کا صاف پانی، ادویات اور طبی سہولیات شامل ہیں۔
