لندن( سپورٹس ڈیسک)انگلینڈ کرکٹ کے منیجنگ ڈائریکٹر روب کی نے ایشیز سیریز میں بین اسٹوکس کی ممکنہ واپسی کا عندیہ دیتے ہوئے کہا ہے کہ ان کی واپسی کے امکانات کو مکمل طور پر رد نہیں کیا جا سکتا۔روب کی کا کہنا تھا کہ اگرچہ بین اسٹوکس ٹیسٹ کرکٹ سے ریٹائرمنٹ کا اعلان کر چکے ہیں، تاہم ان جیسے کھلاڑی کے بارے میں کوئی حتمی پیش گوئی نہیں کی جا سکتی اور مستقبل میں کچھ بھی ممکن ہے۔بین اسٹوکس نے گزشتہ ماہ نیوزی لینڈ کے خلاف سیریز کے دوران ذہنی اور جسمانی تھکن کو وجہ قرار دیتے ہوئے بین الاقوامی کرکٹ سے کنارہ کشی کا اعلان کیا تھا۔اس وقت انہوں نے کہا تھا کہ ممکن ہے وہ اگلی ایشیز سیریز میدان میں کھیلنے کے بجائے تماشائیوں کے باکس سے دیکھیں، تاہم اس کے باوجود ان کی واپسی سے متعلق قیاس آرائیاں جاری ہیں۔آسٹریلیا کے ہیڈ کوچ اینڈریو میکڈونلڈ نے بھی کہا تھا کہ اگر اسٹوکس ایشیز کے لیے دوبارہ ریٹائرمنٹ ختم کرتے ہیں تو یہ کرکٹ کی تاریخ کی بہترین کہانیوں میں سے ایک ہوگی۔دوسری جانب روب کی نے واضح کیا کہ بین اسٹوکس نے خود واپسی کا کوئی اشارہ نہیں دیا، تاہم انگلینڈ ٹیم میں ان کے لیے دروازے اب بھی کھلے ہیں۔
