بین اسٹوکس کی کپتانی خطرے میں، نائٹ کلب واقعے پر انگلینڈ بورڈ کی تحقیقات شروع

 انگلینڈ( سپورٹس ڈیسک)انگلینڈ کرکٹ ٹیم کے کپتان بین اسٹوکس اور فاسٹ بولر گس ایٹکنسن نائٹ کلب میں پیش آنے والے مبینہ واقعے کے بعد مشکلات کا شکار ہو گئے ہیں، جس کے باعث کپتانی میں تبدیلی کا امکان ظاہر کیا جا رہا ہے۔میڈیا رپورٹس کے مطابق انگلینڈ کرکٹ بورڈ نے اس معاملے کی باقاعدہ تحقیقات شروع کر دی ہیں۔ امکان ہے کہ بین اسٹوکس کی جگہ نوجوان کھلاڑی ہیری بروک کو نیوزی لینڈ کے خلاف دوسرے ٹیسٹ میں ٹیم کی قیادت سونپی جا سکتی ہے۔رپورٹ میں دعویٰ کیا گیا ہے کہ نائٹ کلب میں کھلاڑیوں اور ایک رگبی کھلاڑی کے درمیان جھگڑا ہوا، جس کے دوران مبینہ طور پر ایک فاسٹ بولر نے رگبی کھلاڑی کو مکا مارا۔ واقعے میں بورڈ کے سیکیورٹی اہلکار کو بھی چوٹ آئی، تاہم کرکٹرز محفوظ رہے۔انگلینڈ کرکٹ بورڈ کے مطابق کھلاڑیوں نے ضابطہ اخلاق کی خلاف ورزی کی ہے، جس پر سخت تادیبی کارروائی کا امکان ہے۔ تاہم ابتدائی اطلاعات کے مطابق صورتحال کو مکمل طور پر پرتشدد قرار نہیں دیا گیا اور پولیس کو بھی اس واقعے میں شامل نہیں کیا گیا۔