کراچی( شوبز ڈیسک)بلال سعید نے سوشل میڈیا پر وائرل ہونے والی اپنی ویڈیو پر تنقید کرنے والوں کو سخت جواب دیتے ہوئے کہا ہے کہ بغیر حقیقت جانے الزامات لگانا درست نہیں۔لندن میں اپنے نئے پراجیکٹ کی شوٹنگ کے دوران گلوکار بلال سعید اور آئمہ بیگ کو سڑکوں پر مداحوں کے ساتھ سیلفیاں لیتے دیکھا گیا تھا، جس کی ویڈیو بعد ازاں سوشل میڈیا پر وائرل ہوگئی۔وائرل ویڈیو پر بعض صارفین نے دعویٰ کیا کہ فنکار مبینہ طور پر نشے کی حالت میں تھے اور آئمہ بیگ کے لباس پر بھی تنقید کی گئی۔اس پر ردعمل دیتے ہوئے بلال سعید نے ویڈیو بیان میں کہا کہ جس کلپ کو بنیاد بنا کر تنقید کی جا رہی ہے اس میں ان کے ہاتھ میں کافی کے کپ ہیں، نہ کہ کوئی اور مشروب۔ ان کا کہنا تھا کہ اگر آس پاس لوگ کچھ کر رہے ہوں تو اس کا مطلب یہ نہیں کہ ہم بھی وہی کر رہے ہیں۔انہوں نے ناقدین کو مخاطب کرتے ہوئے کہا کہ بغیر ثبوت کے رائے قائم کرنا درست نہیں، اور وہ اپنے فن کے ذریعے ہمیشہ پاکستان کی نمائندگی کرتے آئے ہیں اور کرتے رہیں گے۔
