کراچی( شوبز ڈیسک) بالی ووڈ کی تاریخ میں کمائی کے اعتبار سے نئے ریکارڈ قائم کرنے والی فلم دھرندھر 2 آن لائن لیک ہوگئی، جس پر مداحوں میں شدید ردعمل دیکھنے میں آیا۔رنویر سنگھ کی پہلی فلم ’دھرندھر‘ کی کامیابی کے بعد اس کا سیکوئل فوری طور پر بنایا گیا، جو ریلیز ہوتے ہی تمام ریکارڈ توڑ گیا۔ ادتیہ دھار کی ہدایتکاری میں تیار ہونے والی یہ فلم 19 مارچ کو سینما گھروں میں ریلیز ہوئی اور تیزی سے شائقین کی توجہ حاصل کی۔تاہم، ریلیز کے دوسرے ہفتے ہی تقریباً چار گھنٹے طویل فلم کا پائریٹڈ ورژن آن لائن اپ لوڈ کر دیا گیا۔ اس سے قبل ادتیہ دھار نے عوام سے اپیل کی تھی کہ وہ فلم کو خراب معیار میں نہ دیکھیں اور نہ ہی اسپوئلرز شیئر کریں۔فلم کے لیک ہونے کے بعد یوٹیوب پر ایک چینل نے مکمل ورژن اپ لوڈ کر دیا، جس پر صارفین نے فوری طور پر رپورٹنگ شروع کر دی اور کئی مداحوں نے براہِ راست ہدایتکار کو ٹیگ کرتے ہوئے کارروائی کا مطالبہ کیا۔
