بشریٰ انصاری کے سابق داماد سے متعلق انکشافات، بیٹی کے ساتھ دھوکے کا دعویٰ

لاہور( شوبز ڈیسک) معروف اداکارہ بشریٰ انصاری نے اپنے ایک حالیہ وی لاگ میں اپنی بڑی بیٹی نریمان انصاری کی نجی زندگی اور طلاق سے متعلق گفتگو کرتے ہوئے سابق داماد کے حوالے سے کئی سنگین الزامات اور انکشافات کیے ہیں۔اپنے بیان میں بشریٰ انصاری نے کہا کہ ان کے سابق داماد نے مبینہ طور پر ان کی بیٹی کے ساتھ دھوکہ کیا اور بعد ازاں نہ صرف رشتہ ختم کیا بلکہ بچوں کو بھی چھوڑ دیا اور اثاثے لے کر علیحدہ ہو گیا۔اداکارہ کے مطابق معاشرے میں ایسے تعلیم یافتہ افراد بھی موجود ہیں جو بظاہر خوش اخلاق اور مہذب نظر آتے ہیں، مگر ان کی نیتیں درست نہیں ہوتیں۔ ان کے بقول ایسے لوگ اکثر اپنے انداز اور میٹھی باتوں کے ذریعے دوسروں کو متاثر کرتے ہیں اور ذاتی فائدے کے لیے رشتے قائم کرتے ہیں۔بشریٰ انصاری نے کہا کہ انہیں اس بات پر حیرت ہوتی ہے کہ بعض اوقات ایسے افراد کے بارے میں خبردار کیے جانے کے باوجود بھی انہیں دوبارہ پڑھی لکھی خواتین کی جانب سے قبول کیا جاتا ہے، جو بعد میں مشکلات کا شکار ہو جاتی ہیں۔انہوں نے مزید کہا کہ ایسے لوگ اپنے نرم رویے کے ذریعے دوسروں کو متاثر کر کے انہیں جذباتی طور پر نقصان پہنچاتے ہیں، جس سے کئی خاندان متاثر ہوتے ہیں۔اداکارہ نے آخر میں کہا کہ وہ اس بات پر شکر گزار ہیں کہ ان کی بیٹی اب محفوظ ہے اور اپنی زندگی میں بہتر طور پر آگے بڑھ رہی ہے، تاہم ایسے واقعات معاشرے کے لیے ایک سنجیدہ لمحۂ فکریہ ہیں۔