لاہور( شوبز ڈیسک)لاہور کی مقامی عدالت میں معروف یوٹیوبر سعد الرحمان المعروف ڈکی بھائی اور ان کی اہلیہ عروب جتوئی سمیت دیگر ملزمان کے خلاف جوئے ایپ کی تشہیر سے متعلق مقدمے کی سماعت ہوئی، جس کے دوران عدالت نے تمام نامزد افراد پر فردِ جرم عائد کر دی۔یہ سماعت ضلع کچہری لاہور میں جوڈیشل مجسٹریٹ نعیم ووٹو کی عدالت میں ہوئی، جہاں سعد الرحمان المعروف ڈکی بھائی سمیت دیگر ملزمان پیش ہوئے اور اپنی حاضری مکمل کروائی۔ اس موقع پر عدالت کو آگاہ کیا گیا کہ این سی سی آئی اے کی جانب سے مقدمے کا چالان پہلے ہی جمع کروایا جا چکا ہے۔دورانِ سماعت سرکاری وکیل نے ملزمان کے خلاف عائد الزامات پر مشتمل چارج شیٹ عدالت میں پڑھ کر سنائی، تاہم تمام ملزمان نے صحتِ جرم سے انکار کر دیا۔ جس کے بعد عدالت نے ڈکی بھائی، ان کی اہلیہ عروب جتوئی اور دیگر نامزد افراد پر باقاعدہ فردِ جرم عائد کرتے ہوئے مقدمے کی کارروائی کو آگے بڑھانے کا حکم دیا۔عدالت نے کیس کے گواہوں کو آئندہ سماعت کے لیے 23 فروری کو طلب کر لیا، جبکہ این سی سی آئی اے کی جانب سے ڈکی بھائی سمیت دیگر افراد کے خلاف مقدمہ درج کیا جا چکا ہے۔
