بیجنگ( ویب ڈیسک)چین 24 اگست کو چاند کے قطب جنوبی کی جانب جدید خلائی مشن چینگ ای 7 روانہ کرے گا، جس کا مقصد وہاں موجود پانی اور برف کے شواہد، مقدار اور ساخت کے بارے میں مزید معلومات حاصل کرنا ہے۔چینی حکام کے مطابق مشن کو لانگ مارچ 5 راکٹ کے ذریعے ہینان کے وین چانگ خلائی مرکز سے روانہ کیا جائے گا۔ اس میں آربٹر، لینڈر، روور اور ایک خاص ہوپر خلائی جہاز شامل ہوگا۔لانچ کے تقریباً پانچ روز بعد مشن چاند کے مدار میں داخل ہوگا، جہاں آربٹر لینڈنگ کے لیے موزوں مقام کا تعین کرے گا۔ ہوپر چاند کے قطب جنوبی کے تاریک گڑھوں پر متعدد پروازیں کرکے ان علاقوں کا جائزہ لے گا اور سطحی تجزیے میں بھی مدد دے گا۔سائنس دان چاند کے اس خطے میں پانی کے بخارات کے شواہد ریموٹ سینسنگ کے ذریعے حاصل کرچکے ہیں، تاہم وہاں برف اور پانی کی براہِ راست پیمائش یا نمونوں کا حصول اب تک ممکن نہیں ہوسکا۔چینگ ای 7 مشن چین کے 2030 کے انسان بردار قمری پروگرام کے لیے تکنیکی بنیاد فراہم کرنے میں بھی اہم کردار ادا کرے گا۔ مشن میں مختلف ممالک کے سائنسی آلات اور تحقیقاتی پے لوڈز بھی شامل ہوں گے۔چین اس سے قبل 2020 میں چینگ ای 5 اور 2024 میں چینگ ای 6 کے ذریعے چاند سے نمونے زمین پر لاچکا ہے۔
