جدہ( مانیٹرنگ ڈیسک)ہالی ووڈ کے معروف اداکار جینکارلو ایسپوزیٹو کے اسلام قبول کرنے کا دعویٰ سامنے آیا ہے۔ یہ دعویٰ سعودی عرب کی جنرل انٹرٹینمنٹ اتھارٹی کے سربراہ ترکی الشیخ نے کیا ہے۔ترکی الشیخ کے مطابق اداکار نے کلمہ شہادت پڑھ کر اسلام قبول کیا اور بعد ازاں فلمی ٹیم کے دیگر افراد کے ہمراہ مسجد میں نماز بھی ادا کی۔ اس حوالے سے ایک ویڈیو بھی سماجی رابطوں کی ویب سائٹس پر گردش کر رہی ہے، جس میں انہیں مسجد میں نماز ادا کرتے دیکھا جا سکتا ہے۔ترکی الشیخ کا کہنا ہے کہ اداکار کا یہ فیصلہ سعودی عرب میں قیام، وہاں کے لوگوں سے میل جول اور کام کے دوران ملنے والے تجربات کا نتیجہ ہے۔ ان کے مطابق جینکارلو ایسپوزیٹو نے سعودی عوام کے اخلاق، محبت اور مہمان نوازی کو سراہا ہے۔
