اسمگلنگ روکنے کیلئے کوسٹ گارڈ، ایف سی اور میری ٹائم سکیورٹی کو کسٹمز اختیارات

اسلام آباد( کامرس ڈیسک) وفاقی بورڈ آف ریونیو نے اسمگلنگ کے خلاف کارروائیوں کو مؤثر بنانے کے لیے پاکستان کوسٹ گارڈ، پاکستان میری ٹائم سکیورٹی ایجنسی اور فرنٹیئر کور بلوچستان کے اہلکاروں کو کسٹمز افسران کے بعض اختیارات اور مخصوص ذمہ داریاں تفویض کردی ہیں۔ایف بی آر کے کسٹمز ونگ نے اس حوالے سے باقاعدہ نوٹیفکیشن جاری کردیئے ہیں۔ اعلامیے کے مطابق یہ اختیارات کسٹمز ایکٹ 1969 کے تحت دیے گئے ہیں اور فوری طور پر نافذ العمل ہوں گے، جبکہ جولائی 2023 میں جاری سابقہ نوٹیفکیشن منسوخ کردیا گیا ہے۔نوٹیفکیشن کے مطابق پاکستان کوسٹ گارڈ اپنے متعلقہ علاقوں میں ساحلی پٹی سے 50 کلومیٹر تک کے دائرے میں مقررہ کسٹمز ذمہ داریاں انجام دے سکے گا۔تاہم شہری حدود، کسٹمز کے مخصوص علاقے اور اسٹیشنز، بندرگاہیں، سرحدی کسٹمز اسٹیشنز، بین الاقوامی ہوائی اڈے اور بانڈڈ گودام سمیت دیگر متعین مقامات اس دائرہ اختیار میں شامل نہیں ہوں گے۔