لاہور( شوبز ڈیسک)اداکارہ اور ماڈل زینب رضا کو ایک ڈرامے میں پہنے گئے لباس کے باعث سوشل میڈیا پر تنقید کا سامنا کرنا پڑ رہا ہے۔تفصیلات کے مطابق اگرچہ ڈرامے میں ان کی اداکاری کو ناظرین کی جانب سے سراہا جا رہا ہے، تاہم ان کے ملبوسات نے خاصی توجہ حاصل کر لی ہے اور اس پر مختلف آرا سامنے آ رہی ہیں۔ڈرامے کے ایک منظر میں وہ جامنی رنگ کی ساڑھی میں نظر آئیں، جس کے ساتھ پہنا گیا بلاؤز بعض ناظرین کے مطابق غیر معمولی طور پر بولڈ تھا۔ اگرچہ اس منظر کو ایڈیٹنگ کے ذریعے نسبتاً محدود انداز میں دکھایا گیا، لیکن لباس کے انتخاب نے سوشل میڈیا پر بحث چھیڑ دی۔اس واقعے کے بعد متعدد صارفین نے ڈراموں میں ملبوسات کے انتخاب پر سوالات اٹھائے اور کہا کہ قومی سطح پر نشر ہونے والے ڈراموں میں لباس کے حوالے سے زیادہ احتیاط کی ضرورت ہے۔ کچھ افراد نے ہدایت کار اور پروڈکشن ٹیم کے فیصلوں کو بھی تنقید کا نشانہ بنایا۔دوسری جانب کچھ مداحوں نے یہ مؤقف اختیار کیا کہ فنکاروں کے لباس کو غیر ضروری تنازع بنانے کے بجائے ان کی اداکاری اور کردار پر توجہ دی جانی چاہیے۔
