شوبز کی کمائی پر بحث، نعمان اعجاز کا ناقدین کو رویہ درست کرنے کا مشورہ

کراچی( شو بز ڈیسک)پاکستان کے سینئر اداکار نعمان اعجاز نے شوبز انڈسٹری کی کمائی کو حرام قرار دینے سے متعلق ہونے والی تنقید پر ردعمل دیتے ہوئے ناقدین کو اپنے رویے پر غور کرنے کا مشورہ دیا ہے۔نعمان اعجاز اپنی بے باک رائے اور سماجی موضوعات پر کھل کر اظہارِ خیال کے لیے جانے جاتے ہیں۔ انہوں نے ایک یوٹیوب ویڈیو میں اپنے دوست کی جانب سے موصول ہونے والا ایک فکر انگیز پیغام بھی شیئر کیا۔اداکار نے کہا کہ انسان کو اللہ تعالیٰ نے فطری طور پر کئی چیزوں کی پہچان عطا کی ہے، جیسے گرم چیز کو ہاتھ، سخت چیز کو دانت اور کڑوی چیز کو زبان فوراً پہچان لیتی ہے، لیکن حلال اور حرام کی تمیز انسان کے ضمیر اور اس کے انتخاب پر چھوڑ دی گئی ہے۔انہوں نے سوال اٹھایا کہ کیا ہم واقعی حلال اور حرام میں فرق نہیں جانتے، اور اگر جانتے ہیں تو پھر غلط اور ناجائز راستوں سے کیوں نہیں بچتے۔ان کے اس بیان کو سوشل میڈیا پر بڑی تعداد میں صارفین نے سراہا، تاہم کچھ صارفین نے ان سے ان کی شوبز سے حاصل ہونے والی آمدن سے متعلق سوال بھی اٹھائے۔