لاہور( شوبز ڈیسک) پنجاب کے تمام تھیٹرز یکم تا 13 محرم الحرام تک بند رکھنے کا فیصلہ کیا گیا ہے، جس کے لیے پنجاب آرٹس کونسل نے باقاعدہ نوٹیفکیشن جاری کر دیا ہے۔نوٹیفکیشن کے مطابق محرم الحرام کے احترام میں اس عرصے کے دوران کسی بھی قسم کا اسٹیج ڈرامہ یا ثقافتی پروگرام منعقد نہیں کیا جائے گا، اور تمام تھیٹرز کو ہدایت کی گئی ہے کہ وہ اس پابندی پر مکمل عملدرآمد یقینی بنائیں۔دوسری جانب یومِ عاشور کے موقع پر ملک بھر میں سکیورٹی انتظامات کو حتمی شکل دی جا رہی ہے۔صوبائی حکومتیں اور ضلعی انتظامیہ مجالس اور جلوسوں کے روٹس کا تفصیلی جائزہ لے رہی ہیں، جبکہ قانون نافذ کرنے والے اداروں کو حساس مقامات پر اضافی نفری تعینات کرنے کی ہدایات جاری کی جا رہی ہیں۔محرم الحرام کے دوران امن و امان کی صورتحال برقرار رکھنے کے لیے متعلقہ ادارے ہنگامی منصوبوں پر عمل درآمد کریں گے تاکہ عزاداروں کو پرامن اور محفوظ ماحول فراہم کیا جا سکے۔
