پشاور( پاکستان خبر) خیبرپختونخوا محکمہ تعلیم کے ترقیاتی منصوبوں کی بروقت تکمیل نہ ہونے کے باعث ان کی لاگت میں کروڑوں روپے اضافے کا انکشاف ہوا ہے۔ذرائع کے مطابق منصوبوں میں تاخیر سے تعمیراتی اخراجات بڑھ گئے، جس کے بعد محکمہ تعلیم نے ترقیاتی منصوبوں کی بروقت تکمیل اور فنڈز کے مؤثر استعمال کے لیے نئی حکمت عملی تیار کرلی ہے۔دستاویزات کے مطابق محکمہ تعلیم نے منصوبوں کی نگرانی، فنڈز کے اجرا اور کارکردگی جانچنے کے لیے 6 رکنی ترقیاتی فنڈز اجرا کمیٹی قائم کردی ہے۔ کمیٹی میں ایڈیشنل سیکرٹری، ڈپٹی سیکرٹریز اور دیگر متعلقہ افسران شامل ہوں گے۔کمیٹی اس بات کا جائزہ لے گی کہ کسی منصوبے کے لیے کتنے فنڈز مختص کیے گئے، اب تک کتنی رقم خرچ ہوئی اور عملی طور پر کتنا کام مکمل کیا جا چکا ہے۔ اس کے علاوہ منصوبوں کی پیش رفت سے متعلق رپورٹ منصوبہ بندی افسر کو فراہم کی جائے گی۔دستاویزات کے مطابق کمیٹی کی ذمہ داری ہوگی کہ وہ جاری منصوبوں کے لیے درکار فنڈز، واجبات اور مختص رقم کے مقابلے میں ہونے والے اخراجات کا جائزہ لے کر رپورٹ تیار کرے۔کمیٹی یہ بھی سفارش کرے گی کہ زیر تعمیر منصوبوں کے لیے کن بنیادوں پر فنڈز جاری کیے جائیں تاکہ ترقیاتی کام بروقت مکمل ہوسکیں اور سرکاری وسائل کا بہتر استعمال یقینی بنایا جا سکے۔
