اسلام آباد( ویب ڈیسک) وزیرِ مملکت برائے انفارمیشن ٹیکنالوجی شزا فاطمہ نے کہا ہے کہ جدید ٹیکنالوجی کے استعمال سے ملک کے مالیاتی نظام کو زیادہ مضبوط اور مؤثر بنایا جارہا ہے، جبکہ حکومت ڈیجیٹل معیشت کے فروغ کے لیے عملی اقدامات کررہی ہے۔انہوں نے کہا کہ شہریوں کو جدید ڈیجیٹل مالیاتی سہولیات سے جوڑنا حکومت کی اولین ترجیحات میں شامل ہے۔ ڈیجیٹل نظام کے ذریعے مختلف شعبوں میں شفافیت بڑھانے کے ساتھ عوام کا اعتماد بھی مضبوط کیا جارہا ہے۔شزا فاطمہ کے مطابق حکومت ڈیجیٹل ذرائع سے مالی لین دین کے فروغ اور مالیاتی شعبے کو جدید ٹیکنالوجی سے ہم آہنگ کرنے پر خصوصی توجہ دے رہی ہے۔وزیرِ مملکت نے خصوصی سرمایہ کاری سہولت کونسل کو ملکی ترقی اور سرمایہ کاری کے فروغ کے لیے اہم پلیٹ فارم قرار دیتے ہوئے کہا کہ اس کے ذریعے قومی معیشت اور سرمایہ کاری کے شعبے میں مؤثر اقدامات کیے جارہے ہیں۔انہوں نے کہا کہ مختلف متعلقہ ادارے خصوصی سرمایہ کاری سہولت کونسل کے تحت باہمی تعاون سے ملکی ترقی کے لیے کام کررہے ہیں۔
