ممبئی( شو بز ڈیسک)بھارتی پنجابی گلوکار دلجیت دوسانجھ نے انکشاف کیا ہے کہ اسٹیج پر پرفارم کرنے سے قبل نصرت فتح علی خان کی قوالی سن کر وہ بے اختیار رو پڑے۔انسٹاگرام لائیو سیشن کے دوران دلجیت دوسانجھ نے بتایا کہ میلان میں شو سے قبل یوگا کی تیاری کے دوران وہ نصرت فتح علی خان کی قوالی ’من اٹکیا بے پرواہ دے نال‘ سن رہے تھے۔گلوکار کے مطابق قوالی میں جب مصرعے ’قاضی ملا مٹی دیندے، کھرے سیانے راہ دسیندے‘ آئے تو ان کے اندر کچھ ٹوٹ سا گیا۔ وہ یوگا میٹ پر بیٹھ کر تقریباً 5 سے 10 منٹ تک روتے رہے، جس کے بعد یوگا شروع کیا۔دلجیت دوسانجھ نے کہا کہ نصرت فتح علی خان کے کلام میں ایسی سچائی ہے جو سننے کے دیر بعد تک انسان کے اندر موجود رہتی ہے اور بعض مصرعے دل میں اتر کر کبھی باہر نہیں نکلتے۔یہ پہلا موقع نہیں کہ دلجیت دوسانجھ نے نصرت فتح علی خان کو خراجِ عقیدت پیش کیا ہو، اس سے قبل 12 ستمبر کو لندن کے ویمبلی اسٹیڈیم میں اپنے کنسرٹ کے دوران انہوں نے ’سانسوں کی مالا‘ بھی پیش کیا تھا، جہاں تقریباً 90 ہزار افراد موجود تھے۔
