ممبئی( شو بز ڈیسک)بھارتی پنجابی گلوکار و اداکار دلجیت دوسانجھ کا نیا گانا ’ڈیول‘ ریلیز ہوتے ہی سوشل میڈیا پر توجہ کا مرکز بن گیا، جس کی میوزک ویڈیو میں احتجاج، پولیس اور مظاہرین کے درمیان کشیدگی اور جھڑپوں کے مناظر دکھائے گئے ہیں۔ویڈیو میں بڑی تعداد میں افراد کو احتجاج کرتے اور پلے کارڈز اٹھائے دیکھا جاسکتا ہے، جن پر ’سیو آور فیوچر‘ اور ’آور فیوچر، آور فائٹ‘ جیسے پیغامات درج ہیں۔ ویڈیو میں کسی مخصوص احتجاج، تنظیم یا تحریک کا نام نہیں لیا گیا، تاہم مناظر نے بعض ناظرین کو جولائی میں ہونے والے حالیہ طلبا مظاہروں کی یاد دلا دی ہے۔ویڈیو کے ایک منظر میں دلجیت دوسانجھ مظاہرین کے ہجوم میں موجود دکھائی دیتے ہیں، جبکہ دوسری طرف پولیس اور احتجاج کرنے والوں کے درمیان صورتحال کشیدہ نظر آتی ہے۔میوزک ویڈیو کے اختتام پر ایک کم عمر لڑکی ہاتھ میں سفید گلاب لیے پولیس اہلکار کی جانب بڑھتی ہے، جس پر اہلکار آگے آکر اسے گلے لگا لیتا ہے۔
