لاہور( شوبز ڈیسک)پاکستانی مارننگ شو میزبان فضا علی اور ڈیجیٹل انفلوئنسر ڈاکٹر نبیہا کے درمیان تنازع ایک بار پھر سوشل میڈیا پر زیرِ بحث آ گیا ہے۔ اس بار ڈاکٹر نبیہا کے شوہر حارث کھوکھر نے فضا علی کے بارے میں سخت بیان دیا ہے۔رمضان کے ابتدائی دنوں میں فضا علی نے اپنی نشریات میں ڈاکٹر نبیہا کی ازدواجی زندگی اور علیحدگی کے بارے میں بات کی تھی، جس کے بعد سوشل میڈیا پر ہنگامہ برپا ہوا۔ بعد ازاں ڈاکٹر نبیہا اور ان کے شوہر نے اپنے مسائل حل کر لیے اور دوبارہ خوشگوار زندگی گزارنے لگے۔حارث کھوکھر نے ایک حالیہ انٹرویو میں کہا کہ فضا علی نے رمضان کے دوران گویا ’’شیطان کی جانشین‘‘ کا کردار ادا کیا۔ ان کے مطابق میاں بیوی کے نجی معاملات کو عوامی یا ڈیجیٹل میڈیا پر لانا صورتحال کو مزید پیچیدہ بنا دیتا ہے اور اکثر تنازعات شدت اختیار کر جاتے ہیں۔انہوں نے مزید کہا کہ اختلافات عموماً دو افراد کی انا کا مسئلہ ہوتے ہیں جنہیں باہمی گفتگو سے حل کیا جا سکتا ہے، لیکن جب خاندان اور سوشل میڈیا اس میں شامل ہوتے ہیں تو معاملات مزید الجھ جاتے ہیں۔ حارث کھوکھر نے تاکید کی کہ بہتر ہے کہ میاں بیوی اپنے مسائل خود حل کریں اور کسی تیسرے فریق کو شامل نہ کریں، تاہم جب فضا علی نے ٹی وی پر ان کا نام لیا تو جواب دینا ناگزیر تھا۔
