لاہور ( شوبز ڈیسک) معروف اداکارہ تزئین حسین نے دوسری شادی سے متعلق اپنے خیالات کا اظہار کرتے ہوئے کہا ہے کہ اس اہم فیصلے میں جلد بازی کے بجائے مناسب وقت لینا نہایت ضروری ہوتا ہے۔لیجنڈری اداکار طلعت حسین کی صاحبزادی تزئین حسین نے اپنی زندگی کے مشکل دور کا ذکر کرتے ہوئے بتایا کہ وہ اپنے شوہر کے انتقال کے بعد پانچ سال تک اکیلی ماں کے طور پر زندگی گزارتی رہیں۔ ان کے مطابق اس عرصے نے انہیں خود کو سنبھالنے اور زندگی کو نئے انداز میں سمجھنے کا موقع فراہم کیا۔ایک نجی پروگرام میں گفتگو کرتے ہوئے انہوں نے کہا کہ دوسری شادی کا فیصلہ انہوں نے پانچ سال بعد کیا کیونکہ تنہائی انسان کو بہت کچھ سکھاتی ہے اور اس دوران وہ اپنی شخصیت کے ایسے پہلوؤں کو جان پاتا ہے جن سے پہلے آگاہی نہیں ہوتی۔انہوں نے مزید کہا کہ کسی نئے رشتے میں آنے سے پہلے ذہنی طور پر خود کو تیار کرنا ضروری ہے تاکہ مستقبل میں بہتر اور مضبوط تعلق قائم کیا جا سکے۔
