لاہور( شوبز ڈیسک)سوشل ایکٹوسٹ اور ماہر نفسیات ڈاکٹر نبیحہ علی خان نے اپنے شوہر سے علیحدگی کے لیے فیملی کورٹ میں خلع کی درخواست دائر کر دی ہے۔تفصیلات کے مطابق ڈاکٹر نبیحہ علی نے اپنے وکیل چوہدری مدثر ایڈووکیٹ کے ذریعے عدالت سے رجوع کیا، جہاں انہوں نے مؤقف اختیار کیا کہ وہ اپنے شوہر حارث کھوکھر کے ساتھ ازدواجی زندگی مزید جاری نہیں رکھنا چاہتیں۔درخواست میں الزام عائد کیا گیا ہے کہ ان کے شوہر کا رویہ نامناسب تھا، وہ مبینہ طور پر انہیں گالم گلوچ کا نشانہ بناتے اور تشدد بھی کرتے تھے۔ درخواست گزار کے مطابق انہیں عزت اور بہتر سلوک نہیں ملا۔ڈاکٹر نبیحہ علی نے عدالت کو بتایا کہ شوہر کے رویے کے باعث وہ شدید مشکلات کا شکار رہیں اور اب ان کے ساتھ زندگی گزارنا ممکن نہیں۔درخواست میں عدالت سے استدعا کی گئی ہے کہ خلع کی ڈگری جاری کرنے کا حکم دیا جائے۔
