دعا لیپا نے ممنوعہ کتابوں کیلئے خصوصی لائبریری قائم کرنے کا اعلان کر دیا

پورٹو( شوبز ڈیسک) عالمی شہرت یافتہ پاپ گلوکارہ دعا لیپا نے شادی کے ایک ہفتے بعد پرتگال میں ممنوعہ اور سنسر شدہ کتابوں پر مشتمل ایک خصوصی لائبریری قائم کرنے کا اعلان کیا ہے۔"منی فیسٹو لائبریری" کے نام سے قائم کی جانے والی یہ لائبریری دعا لیپا کے 2021 میں شروع کیے گئے بک کلب "سروس 95" کا مستقل حصہ ہوگی۔ لائبریری کا افتتاح آج پورٹو میں واقع تاریخی لیوراریا لیلو بک سٹور میں کیا جا رہا ہے۔یہ منصوبہ لیوراریا لیلو کی 120 ویں سالگرہ کی تقریبات کا حصہ ہے، تاہم تقریب کے بعد بھی یہ لائبریری مستقل طور پر اسی مقام پر موجود رہے گی۔دعا لیپا نے کہا کہ جب انہوں نے سروس 95 بک کلب کی بنیاد رکھی تو ان کا مقصد دنیا بھر کے مصنفین اور قارئین کے لیے ایسا پلیٹ فارم فراہم کرنا تھا جہاں وہ آزادانہ طور پر خیالات کا تبادلہ کر سکیں۔ ان کے مطابق کتابیں لوگوں کو ایک دوسرے کے قریب لاتی ہیں، لیکن ہر کوئی اس آزادی کا حامی نہیں ہوتا۔انہوں نے اس منصوبے کو اپنی خوابوں کی شراکت داری قرار دیتے ہوئے کہا کہ لائبریری میں شامل 100 منتخب کتابیں ایسی ہیں جو یا تو اہم سوالات اٹھاتی ہیں یا خود پابندیوں اور تنازعات کا سامنا کر چکی ہیں۔ ان کے مطابق ان میں شامل کئی مصنفین نے اپنے خیالات کے اظہار کی بھاری قیمت ادا کی۔اس مجموعے میں The Handmaid's Tale، Felon اور اولگا توکارچوک سمیت کئی معروف مصنفین کی تخلیقات شامل ہیں۔دعا لیپا نے کہا کہ یہ لائبریری ان کتابوں اور مصنفین کو خراجِ تحسین پیش کرنے کے لیے قائم کی جا رہی ہے جنہوں نے طاقت اور جبر کے نظام کو بے نقاب کیا۔ ان کے بقول یہ ان قارئین کے لیے بھی ایک علامت ہے جو یہ قبول نہیں کرتے کہ انہیں بتایا جائے کہ کون سی کتاب پڑھنی چاہیے اور کون سی نہیں۔انہوں نے عوام کو دعوت دیتے ہوئے کہا کہ وہ لائبریری کا دورہ کریں، کتابوں کا مطالعہ کریں اور خود فیصلہ کریں کہ ان شیلفوں پر کیا ہونا چاہیے، کیونکہ بعض اوقات سب سے انقلابی عمل ایک کتاب پڑھنا اور اس پر گفتگو کرنا ہوتا ہے۔کتابیں دعا لیپا کی ذاتی زندگی کا بھی اہم حصہ رہی ہیں۔ ان کی اپنے شوہر اداکار کیلم ٹرنر سے پہلی ملاقات ایک بار میں ہوئی تھی، جہاں دونوں Trust کا مطالعہ کر رہے تھے۔ رواں برس دعا لیپا نے International Booker Prize 10th Anniversary کی تقریب میں بھی کلیدی خطاب کیا تھا۔