افغانستان میں معاشی مشکلات برقرار، عوام نے حالات پر تشویش ظاہر کر دی

کابل( مانیٹرنگ ڈیسک)افغانستان میں معاشی مشکلات بدستور برقرار ہیں اور متعدد شہری روزگار اور مہنگائی کے مسائل کے باعث پریشانی کا شکار ہیں۔افغانستان کے مقامی اخبار ہشت صبح کی رپورٹ کے مطابق کئی شہریوں کا کہنا ہے کہ معاشی بہتری کے دعوے ان کی روزمرہ زندگی کی مشکلات سے مطابقت نہیں رکھتے اور بہت سے خاندان بنیادی ضروریات پوری کرنے میں بھی دشواری محسوس کر رہے ہیں۔رپورٹ میں کہا گیا ہے کہ خواتین پر عائد پابندیوں اور انہیں معاشی سرگرمیوں سے دور رکھنے کے باعث ملکی معیشت کو بھی منفی اثرات کا سامنا ہے۔ہشت صبح کے مطابق افغان مزدوروں اور شہریوں کا کہنا ہے کہ معاشی ترقی کے دعووں کے ساتھ عوامی فلاح اور روزگار کے مواقع میں اضافے پر بھی توجہ دی جانی چاہیے۔ رپورٹ کے مطابق ملک میں روزگار کے مواقع محدود ہیں جبکہ بیرونی سرمایہ کاری کے فروغ کے لیے درکار سہولیات بھی ناکافی ہیں۔اقوام متحدہ کے ترقیاتی پروگرام کے سربراہ ایچم سٹینر کے مطابق افغان خواتین کی معیشت میں فعال شرکت کے بغیر افغانستان کی پائیدار معاشی بحالی ممکن نہیں۔ مقامی میڈیا اور بین الاقوامی اداروں کی رپورٹس کے مطابق افغانستان کو معاشی استحکام کے لیے وسیع اصلاحات اور سرمایہ کاری کی ضرورت ہے۔