اسلام آباد( کامرس ڈیسک) سینٹرل پاور پرچیزنگ ایجنسی (سی پی پی اے) نے ستمبر کی فیول پرائس ایڈجسٹمنٹ کے تحت بجلی کی قیمت میں فی یونٹ 2 روپے 56 پیسے اضافے کے لیے نیپرا سے رجوع کرلیا ہے۔نیپرا کے مطابق درخواست پر سماعت 29 اکتوبر کو ہوگی۔ سی پی پی اے کی درخواست میں بتایا گیا ہے کہ ستمبر میں بجلی کی فی یونٹ اوسط ایندھن لاگت کا تخمینہ 7 روپے 46 پیسے تھا، تاہم یہ بڑھ کر 10 روپے 2 پیسے ہوگئی۔درخواست کے مطابق ستمبر میں مقامی کوئلے سے 7 ارب 95 کروڑ روپے، درآمدی کوئلے سے 37 ارب 14 کروڑ روپے اور ڈیزل سے بجلی کی پیداوار پر 13 ارب 26 کروڑ روپے خرچ ہوئے۔ اسی دوران فرنس آئل پر 11 ارب 81 کروڑ روپے استعمال کیے گئے۔سی پی پی اے نے بتایا کہ مقامی گیس سے بجلی پیدا کرنے پر 13 ارب 89 کروڑ روپے جبکہ ایل این جی سے بجلی کی پیداوار پر 31 ارب 93 کروڑ روپے لاگت آئی۔ ستمبر کے دوران بجلی کی پیداوار پر مجموعی ایندھن اخراجات 127 ارب 87 کروڑ روپے رہے۔درخواست کے مطابق ستمبر میں بجلی کی تقسیم کار کمپنیوں نے مجموعی طور پر 12 ارب 76 کروڑ یونٹ بجلی فروخت کی۔
