ہوائی قلعے نہیں بنائے، عوامی خدمات کو عالمی سطح پر سراہا گیا: مریم نواز

لاہور (پاکستان خبر) وزیراعلیٰ پنجاب مریم نواز نے کہا ہے کہ صوبے کے لیے ان کی خدمات کو عالمی سطح پر تسلیم کیا گیا ہے۔ انہوں نے دعویٰ کیا کہ محض دعوے کرنے کے بجائے مستحق خاندانوں کو اپنی چھت فراہم کرنے کے خواب کی تکمیل کے لیے عملی اقدامات کیے ہیں۔لاہور میں سندھ کی انتظامی سروس کے افسران سے خطاب کرتے ہوئے مریم نواز نے کہا کہ پاکستان نے انہیں عزت اور شناخت دی ہے، جس پر وہ ملک کی شکر گزار ہیں۔ ان کے مطابق انتظامی افسران قابل فخر ہیں اور وہ روزانہ ان کے ساتھ مل کر ٹیم کی صورت میں کام کرتی ہیں۔وزیراعلیٰ نے کہا کہ وزارت اعلیٰ کا منصب صرف سرکاری گاڑی میں آنے جانے کا نام نہیں بلکہ ان کی اولین ترجیح عوام کی خدمت ہے۔ انہوں نے کہا کہ مشکلات کے باوجود وہ روزانہ عوامی فلاح کے جذبے کے ساتھ کام کرتی ہیں اور لوگوں کی بہتری کے لیے مسلسل فیصلے کیے جاتے ہیں۔ ان کے بقول دفتر آکر حاضری لگانا اور مشکل کاموں سے گریز کرکے صرف آسان معاملات نمٹانا حقیقی ملازمت نہیں۔مریم نواز کا کہنا تھا کہ سرکاری عہدے پر فائز شخص کو سب سے پہلے اپنی ذات کے بجائے عوامی مفاد کو ترجیح دینی چاہیے۔ انہوں نے دعویٰ کیا کہ پنجاب کے حکومتی امور چلانے میں انہیں کبھی مشکلات کا سامنا نہیں کرنا پڑا۔انہوں نے اپنی چھت اپنا گھر اسکیم کا ذکر کرتے ہوئے کہا کہ اس کی کامیابی کے لیے مؤثر نگرانی کا نظام قائم کیا گیا ہے۔ گھر کی تعمیر کے لیے قرض کی رقم مرحلہ وار جاری کی جاتی ہے اور ہر مرحلے پر تعمیراتی کام کی جانچ کی جاتی ہے۔وزیراعلیٰ پنجاب نے مزید کہا کہ انہوں نے کسی افسر کی تعیناتی سفارش پر نہیں کی اور ہر جگہ میرٹ کو مقدم رکھا۔