جنوبی لبنان میں کشیدگی میں اضافہ، ہزاروں افراد نقل مکانی پر مجبور

بیروت( مانیٹرنگ ڈیسک) جنوبی لبنان میں جاری کشیدگی کے باعث نبطیہ اور صور جیسے اہم شہروں کے عوام شدید مشکلات کا شکار ہیں، جبکہ حملوں کے پھیلاؤ نے صورتحال کو مزید سنگین بنا دیا ہے۔الجزیرہ کی رپورٹ کے مطابق صور شہر کی آبادی 80 ہزار سے زائد ہے جبکہ نبطیہ میں بھی بڑی تعداد میں شہری آباد ہیں، جو اب اپنی حفاظت کے لیے گھروں سے نقل مکانی پر مجبور ہو رہے ہیں۔مقامی افراد دریائے لیطانی کے شمال میں واقع نسبتاً محفوظ علاقوں کی جانب منتقل ہو رہے ہیں، جس کے باعث انسانی بحران کی صورتحال پیدا ہو گئی ہے۔رپورٹ میں کہا گیا ہے کہ اس صورتحال نے نہ صرف شہریوں کی روزمرہ زندگی متاثر کی ہے بلکہ حکومت کے لیے بھی شدید انتظامی چیلنجز پیدا ہو گئے ہیں، کیونکہ بڑی تعداد میں بے گھر افراد کو سہولیات فراہم کرنا مشکل ہو گیا ہے۔لبنان کا بنیادی ڈھانچہ پہلے ہی کمزور حالت میں تھا، جس کے باعث موجودہ بحران مزید پیچیدہ ہو گیا ہے۔ حکومتی سطح پر صورتحال پر قابو پانے کے لیے مختلف اقدامات اور سفارتی کوششیں بھی جاری ہیں۔لبنان کی وزارت صحت کے مطابق حالیہ تنازع کے آغاز سے اب تک 3 ہزار 412 افراد اپنی جانوں سے ہاتھ دھو بیٹھے ہیں۔